کراچی(نیشنل ٹائمز) وزیراعلیٰ سندھ مراد علی شاہ نے کہا ہے کہ بارش کے پانی میں ڈوبنے والے علاقے سعدی ٹاون اور سعدی گارڈن دریا کے راستے پر بنے ہوئے ہیں۔
کراچی کے بارش سے متاثرہ علاقوں کے دورے میں میڈیا سے گفتگو میں وزیراعلیٰ سندھ نے کہا ملیر ایکسپریس وے کا جو حصہ پانی نے کاٹا وہ ابھی زیر تعمیر تھا، کام کے دوران دریا نے مٹی کو ہٹادیا تو یہ کوئی بڑی بات نہیں ہے۔انہوں نے کہا ہے کہ سعدی ٹاون اور سعدی گارڈن دریا کے راستے پر بنے ہوئے ہیں، دریا کے راستے پر پکی آبادیوں کے لیے حکومت سندھ نے کوئی زمین الاٹ نہیں کی۔ مراد علی شاہ نے کہا ہے کہ دریا کا راستہ روکنا قدرت سے مقابلہ کرنا ہے، کنٹونمنٹ ایریاز میں گرین بیلٹ پر پارکنگ بنانے سے بھی پانی پھیلا ہے۔