لاہور(نیشنل ٹائمز)پنجاب حکومت نے فلڈ ریلیف آپریشن کے دوران جاں بحق ہونے والے اسسٹنٹ کمشنر پتوکی فُرقان احمد خان کو اعلیٰ سول ایوارڈ دینے کا فیصلہ کیا ہے۔
وزیراعلیٰ پنجاب مریم نواز نے اسسٹنٹ کمشنر پتوکی فرقان احمد خان مرحوم کی خدمات کو خراج عقیدت پیش کیا ہے اور انہیں اعلیٰ سول ایوارڈ دینے کے فیصلے کے علاوہ اُن کے ورثا کو ایک کروڑ روپے گرانٹ دینے کا بھی اعلان کیا ہے۔اسسٹنٹ کمشنرپتوکی فرقان احمدخان کینسرکے مریض ہونے کے باوجود 4 دن سے مسلسل فلڈ ریلیف ڈیوٹی کررہے تھے ۔وہ گزشتہ دنوں پتوکی کے سیلاب زدہ علاقے میں ریلیف آپریشن میں مصروف رہے اور متاثرین سیلاب کو خوراک ، ادویات اور دیگر سہولتوں کی فراہمی کیلئے مسلسل کام کیا۔اسسٹنٹ کمشنر پتوکی فرقان احمد اتوار کو دریائے راوی میں ہیڈ بلوکی میں سیلاب سے متاثرہ علاقے گئے ہوئے تھے کہ اسی دوران انہیں دل کا دورہ پڑا جو جان لیوا ثابت ہوا۔وزیراعلیٰ پنجاب مریم نواز نےکہا ہے کہ عوام کی مدد کرتے ہوئے اپنی جان کا نذرانہ پیش کرنے والے حقیقی ہیرو ہیں،فرقان احمد خان مرحوم کی فرض شناسی ہمیشہ یاد رکھی جائے گی۔فرقان احمد کے ورثا کو ایک کروڑ روپے گرانٹ بھی دی جائے گی جس کی وزیراعلیٰ پنجاب مریم نواز نے منظوری دے دی ہے۔