اسلام آباد (نیشنل ٹائمز) وفاقی کابینہ نے اسلام آباد ایئرپورٹ کی مینجمنٹ متحدہ عرب امارات کے سپرد کرنے کی باضابطہ منظوری دے دی ہے۔ یہ فیصلہ وزیرِ خارجہ اسحاق ڈار کی زیرِ صدارت کابینہ کمیٹی برائے انٹر گورنمنٹ کمرشل ٹرانزیکشنز کے اجلاس میں کیا گیا۔

اجلاس میں متحدہ عرب امارات کے ساتھ معاہدے کا فریم ورک تیار کرنے کا فیصلہ کیا گیا ہے، جس کے لیے ایک مذاکراتی ٹیم تشکیل دے دی گئی ہے۔ ٹیم کی سربراہی وزیرِ اعظم کے مشیر برائے نجکاری کریں گے، جبکہ ٹیم وزارتِ دفاع، خزانہ، قانون اور نجکاری سے مشاورت کے بعد معاہدے کی تفصیلات کو حتمی شکل دے گی۔

حکومتی ذرائع کے مطابق یہ اقدام معاشی استحکام اور سرکاری اداروں کی کارکردگی بہتر بنانے کی وسیع تر حکمت عملی کا حصہ ہے۔ مستقبل میں ملک کے دیگر بڑے ایئرپورٹس کو بھی آؤٹ سورس کرنے کے امکانات زیرِ غور ہیں۔

واضح رہے کہ اسلام آباد ایئرپورٹ، جس کا افتتاح 2018 میں ہوا، طویل عرصے سے انتظامی مسائل اور مالی خسارے کا شکار ہے۔ توقع کی جا رہی ہے کہ متحدہ عرب امارات کی شمولیت سے نہ صرف انتظامی بہتری آئے گی بلکہ مسافروں کو سہولیات میں اضافہ اور ایوی ایشن سیکٹر میں سرمایہ کاری کے مواقع بھی پیدا ہوں گے۔