بارسلونا (نیشنل ٹائمز) گورنر خیبرپختونخوا فیصل کریم کنڈی نے بارسلونا میں قائم پاکستانی قونصلیٹ کا دورہ کیا، جہاں قونصل جنرل مراد علی وزیر اور قونصلیٹ عملے نے ان کا پرتپاک خیرمقدم کیا۔

دورے کے دوران قونصل جنرل مراد وزیر نے گورنر کو قونصلیٹ کی جانب سے پاکستانی کمیونٹی سے رابطہ، پاکستان کا مثبت امیج اجاگر کرنے اور بیرونی سرمایہ کاری کے فروغ کے لیے جاری اقدامات پر تفصیلی بریفنگ دی۔

گورنر خیبرپختونخوا فیصل کریم کنڈی نے قونصل جنرل اور ان کے عملے کی خدمات کو سراہتے ہوئے کہا کہ بیرون ملک پاکستانی مشنز کا کردار نہایت اہم ہے، اور بارسلونا قونصلیٹ پاکستانی کمیونٹی سے مثالی رابطہ کاری انجام دے رہا ہے۔

اس موقع پر قونصل جنرل مراد وزیر نے گورنر فیصل کریم کنڈی اور ان کے ہمراہ وفد کے اراکین کو روایتی ٹوپیاں پیش کر کے ان کی عزت افزائی کی، جس پر گورنر نے شکریہ ادا کیا۔