بارسلونا (نیشنل ٹائمز) گورنر خیبرپختونخوا فیصل کریم کنڈی نے اپنے وفد کے ہمراہ گورنر بارسلونا ماری کارمین گارسیا سے گورنر ہاؤس بارسلونا میں ملاقات کی۔ ملاقات میں باہمی دلچسپی کے امور، موسمیاتی تبدیلیوں، حالیہ سیلابی تباہ کاریوں اور خیبرپختونخوا میں مذہبی سیاحت کے فروغ سے متعلق امور پر تفصیلی گفتگو کی گئی۔
وفد میں قونصل جنرل آف پاکستان بارسلونا مراد علی وزیر، کمیونٹی ویلفیئر اتاشی چوہدری سالک گوندل، پاک فیڈریشن اسپین کے سینئر نائب صدر حافظ عبدالرزاق صادق، ڈپٹی اسپیکر ایاز عباسی، سینیئر صحافی محسن رضا، امریکہ سے فصیح حیدر، بیلجئیم سے کشمیر کونسل کے سربراہ سید علی رضا اور سینیئر صحافی علی فرقان شامل تھے۔
ملاقات کے دوران خیبرپختونخوا میں حالیہ سیلاب کے نقصانات اور متاثرہ عوام کی بحالی کے لیے جاری امدادی سرگرمیوں پر تبادلہ خیال ہوا۔ گورنر فیصل کریم کنڈی نے موسمیاتی تبدیلی کو ایک عالمی مسئلہ قرار دیتے ہوئے کہا کہ اس کے منفی اثرات نہ صرف پاکستان بلکہ دنیا بھر میں محسوس کیے جا رہے ہیں۔ ان کا کہنا تھا کہ اس چیلنج سے نمٹنے کے لیے عالمی سطح پر مشترکہ کوششوں کی ضرورت ہے۔
