اسلام آباد (وقاص کھوکھر/رائل نیوز) تھانہ شالیمار کی حدود میں خطرناک ملزم کی قیادت میں 15 سے 20 مسلح افراد نے پولیس اہلکاروں پر حملہ کر دیا۔ملزمان نے پولیس اہلکاروں کو یرغمال بنا کر تشدد کیا، وائرلیس سیٹ، موبائل فون سمیت نقدی چھین لی۔پولیس نے ملزمان کے خلاف دہشت گردی ایکٹ، اقدام قتل، ڈکیتی اور کارِ سرکار میں مداخلت سمیت دیگر سنگین دفعات کے تحت مقدمہ درج کرلیا۔تفصیلات کے مطابق تھانہ شالیمار پولیس کو سیکٹر E-11/2 میں واقع ایک فلیٹ میں لڑائی جھگڑے اور دھنگا فساد کی اطلاع ملی۔پولیس جب موقع پر پہنچی تو 15 سے 20 مسلح افراد آتشیں اسلحہ کے ساتھ جھگڑا فساد کر رہے تھے۔ پولیس کے مطابق، ملزمان کی قیادت بدنام زمانہ اور سابقہ ریکارڈ یافتہ مجرم عاصم جہانگیر ولد جہانگیر خان کر رہا تھا، جو مسلح 30 بور پستول سے لیس تھا۔پولیس پارٹی کو دیکھ کر مسلح ملزمان مشتعل ہو گئے اور ملزمان نے پولیس اہلکاروں کو سنگین نتائج کی دھمکیاں دینے کے ساتھ ساتھ انہیں یرغمال بنا لیا اور اسلحہ کے بٹوں سے پولیس اہلکاروں پر شدید تشدد کیا، جس سے پولیس اہلکار زخمی ہوگئے۔ ملزمان پولیس سے وائرلیس سیٹ، موبائل فون اور پرس جس میں 7,500 روپے نقدی اور دیگر کاغذات موجود تھے چھین کر لے گئے، جبکہ ایک کانسٹیبل سے بھی موبائل فون اور پرس جس میں 2,500 روپے نقدی تھی چھین لیا گیا۔
ملزمان ہوائی فائرنگ کرتے اور پولیس کو دھمکیاں دیتے ہوئے موقع سے فرار ہوگئے، جس سے علاقے میں خوف و ہراس پھیل گیا۔ پولیس ریکارڈ کے مطابق ملزم عاصم جہانگیر انتہائی خطرناک اور سابقہ ریکارڈ یافتہ مجرم ہے، جس کے خلاف اسلام آباد کے مختلف تھانوں میں سنگین نوعیت کی دفعات کے تحت 17 مقدمات درج ہیں۔جس میں لڑائی جھگڑا، ڈکیتی، دہشت گردی، ناجائز اسلحہ رکھنے اور اقدام قتل سمیت مختلف سنگین دفعات شامل ہیں۔
پولیس نے ملزمان کے خلاف دہشت گردی ایکٹ، اقدام قتل، ڈکیتی اور کارِ سرکار میں مداخلت سمیت دیگر سنگین دفعات کے تحت مقدمہ درج کرکے گرفتاری کے لیے چھاپے مارنے شروع کر دیے ہیں۔
