اسلام آباد (نیشنل ٹائمز) پاکستان پیپلز پارٹی کی سینئر رہنما اور سینیٹر پلوشہ خان نے یومِ استحصال کشمیر کے موقع پر کہا کہ 5 اگست کشمیریوں کی تاریخ کا وہ سیاہ دن ہے جب بھارت نے ظلم کی آخری حد پار کر دی۔ سینیٹر پلوشہ خان نے کہا کہ شہید ذوالفقار علی بھٹو نے کشمیر کے لیے ہزار سال تک لڑنے کا اعلان کیا تھا، ہم اسی عہد کی تکمیل کے لیے پرعزم ہیں۔ انہوں نے مزید کہا کہ شہید محترمہ بینظیر بھٹو نے ہر عالمی فورم پر کشمیریوں کی آواز بلند کی، اور آج ہم ان کے مشن کے نگہبان ہیں۔انہوں نے کہا کہ چیئرمین بلاول بھٹو زرداری متعدد بار واضح کر چکے ہیں کہ کشمیریوں کی آزادی پاکستان کا اصولی مؤقف ہے، اور پیپلز پارٹی اس مؤقف سے کبھی پیچھے نہیں ہٹے گی۔سینیٹر پلوشہ خان کا کہنا تھا کہ مودی حکومت کا 5 اگست 2019 کا یکطرفہ اور غیر قانونی اقدام، کشمیر کی متنازع حیثیت کو تبدیل نہیں کر سکتا۔ کشمیری عوام آج بھی بھارتی ظلم کے خلاف سینہ سپر ہیں۔انہوں نے عالمی برادری کو جھنجھوڑتے ہوئے سوال کیا کہ کشمیری مائیں کب تک اپنے بیٹوں کی لاشیں دفناتی رہیں گی؟ بھارتی قابض افواج کے مظالم پر عالمی ضمیر کب جاگے گا؟سینیٹر پلوشہ خان نے اس عزم کا اعادہ کیا کہ پاکستان پیپلز پارٹی کشمیری عوام کی سیاسی، اخلاقی اور سفارتی حمایت جاری رکھے گی اور ہر فورم پر ان کا مقدمہ پوری قوت سے لڑے گی۔