اسلام آباد(نیشنل ٹامز) وزیراعظم نے نوجوانوں کو روزگارکی فراہمی کیلئے پاکستان کے پہلے اسکلز امپیکٹ بانڈ کی منظوری دے دی۔
وزیراعظم شہبازشریف کی زیرصدارت نوجوانوں کو روزگارکی فراہمی کے روڈ میپ پر جائزہ اجلاس ہوا جس دوران وزیراعظم نے پاکستان کے پہلے اسکلز امپیکٹ بانڈ کی منظوری دی۔اجلاس سے گفتگو کرتے ہوئے وزیراعظم کا کہنا تھا کہ یہ جدید ماڈل نوجوانوں کو روزگارکے قابل بنانے کیلئے نجی سرمایہ کاری کو راغب کرے گا۔انہوں نے کہا کہ نوجوانوں کو مارکیٹ کی ضروریات کے مطابق ہنر سکھائے جائیں گے، حکومت نوجوانوں کو ہنر اور تعلیم کے ساتھ ملک وبیرون ملک روزگارفراہم کررہی ہے۔شہباز شریف نے مزید کہاکہ وہ ہر 2 ماہ بعد روزگارکی فراہمی کے روڈ میپ پر عمل درآمد کا جائزہ خود لیں گے، بیرون ملک روزگار کیلئے ہنرمند افراد کی تیاری کو ترجیح دی جائے گی۔