پشاور (نیشنل ٹائمز) ایم کیو ایم پاکستان کے مرکزی رہنماء و جوائنٹ انچارج بین الصوبائی تنظیمی کمیٹی زاہد ملک کی قیادت میں ایک وفد نے گزشتہ دنوں پشاور میں خیبر پختونخواہ کے صوبائی سیکرٹری اطلاعات فضل ہادی کی ٹارگٹ کلنگ پر ان کے آبائی گاؤں اوڈیگرام سوات میں ان کی رہائش گاہ پر ان کے لواحقین سے تعزیت کی اور اس واقعہ کی شدید مذمت کی۔
وفد نے کہا کہ صوبائی حکومت صوبائی دارلحکومت میں امن و امان کی صورتحال کنٹرول کرنے میں مکمل ناکام ہو چکی ہے۔ انہوں نے کہا کہ ایم کیو ایم کے ایک سرگرم رکن کو دن دیہاڑے پر ہجوم علاقے میں اس طرح کا قتل ان کی ناکامی کا منہ بولتا ثبوت ہے۔
زاہد ملک نے کہا کہ ایم کیو ایم کی قیادت اس وقت تک ملزمان کی گرفتاری اور ان کو کیفر کردار تک پہنچانے تک آرام سے نہیں بیٹھے گی اور لواحقین کے ساتھ ہر قسم کا تعاون جاری رکھے گی۔
وفد نے مرحوم کے ایصال ثواب کے لیے دعائے مغفرت اور لواحقین کے صبر و جمیل کے لیے دعا کی۔
ایم کیو ایم کے وفد میں ایم کیو ایم خیبر پختونخواہ کے سینئر نائب صدر و انچارج شعبہ خواتین مریم بی بی، صوبائی جوائنٹ سیکرٹری میاں افتخار احمد، زاہد شاہ نائب صدر مالاکنڈ، اور ایم کیو ایم پنجاب کی صدر شعبہ خواتین عفت ملک ایڈوکیٹ شامل تھی۔
