ویب ڈیسک (نیشل ٹائمز)وزیر اعلیٰ سندھ مراد علی شاہ نے ایک طرف حیدرآباد میں حالیہ بارش سے شہریوں کو درپیش مشکلات پر معذرت کی تو دوسری طرف انتظامیہ اور منتخب نمائندوں کی محنت کو بھی سراہا۔
حیدر آباد میں صوبائی وزراء کے ہمراہ پریس کانفرنس کرتے ہوئے وزیر اعلیٰ سندھ کا کہنا تھا حیدرآباد میں ایک گھنٹے کے دوران 107 ملی میٹربارش ہوئی، کچھ علاقوں میں اب بھی بارش کا پانی موجود ہے، حیدرآباد میں بارش کے بعد مشکلات زیادہ ہوتی ہیں، بارش کا پانی پمپوں سے ہی نکالنا پڑتا ہے۔ان کا کہنا تھا بارش کی وجہ سے لوگوں کو تکلیف ہوئی، جس پر معذرت خواہ ہیں، منتخب نمائندوں، انتظامیہ کی محنت کو سراہتا ہوں، ضلعی انتظامیہ کو بارش کے پانی کی نکاسی اور صفائی کا کام تیز کرنے کی ہدایت کی ہے۔یاد رہے کہ پیر کے روز حیدر آباد میں ہونے والی موسلا دھار بارش کا پانی تاحال کئی علاقوں میں موجود ہے جس کے باعث ناصرف شہریوں کو پریشانی کا سامنا ہے بلکہ بیماریاں پھیلنے کا بھی خدشہ ہے۔