ااسلام آبا (نیشنل ٹائمز)الیکشن کمیشن نے مخصوص نشستوں کی تقسیم کے کیس کا فیصلہ محفوظ کرلیا۔
جیو نیوز کے مطابق چیف الیکشن کمشنر کی سربراہی میں 4 رکنی بینچ نے مخصوص نشستوں کی تقسیم کے کیس کی سماعت کی جس دوران جمعیت علمائے اسلام اور مسلم لیگ (ن) کے وکیل الیکشن کمیشن کےسامنے پیش ہوئے اور دلائل دیے۔ دوران سماعت (ن) لیگ کے وکیل نے کہا کہ جب جے یو آئی اورہماری سیٹیں برابر ہیں تو مخصوص نشستیں کیسے برابر نہیں ہوسکتیں، میرے امیدوار کو کیسے حق رائے دہی سے محروم کیا جاسکتا ہے، ہماری 8 اور جے یو آئی کی 10 سیٹیں کیسے ہوسکتی ہیں۔لیگی وکیل نے کہا کہ 9 ،9 نشستیں دونوں جماعتوں کو ملنی چاہیے تھیں، قانون کے مطابق برابر ہونے پر ٹاس ہوسکتا ہے، ہم برابر ہونے پر ٹاس کرنے کی استدعا کرتے ہیں۔ اس موقع پر جے یو آئی وکیل کامران مرتضیٰ نے کہا کہ 16 فروری تک اگر طارق اعوان کا نوٹیفکیشن ہوجاتا تو وہ بھی شامل ہوتے، ایک سیٹ کی خاطر پورے ملک میں مخصوص نشستوں کا معاملہ دوبارہ کھڑا ہوجائے گا اور پورے ملک کی مخصوص نشستوں کے نوٹیفکیشنز واپس ہوسکتے ہیں۔ واضح رہے کہ 5 روز قبل پشاور ہائیکورٹ نے مخصوص نشستوں کی تقسیم کے خلاف مسلم لیگ ن کی درخواست پر فیصلہ سناتے ہوئے الیکشن کمیشن کو مخصوص نشستوں پر دوبارہ فہرست جاری کرنے کا حکم جاری کیا تھا۔