اسلام آباد (نیشنل ٹائمز) شہری ہوابازی کے برطانوی محکمے Department for Transport (DFT) کی تین رکنی ٹیم نے اسلام آباد انٹرنیشنل ایئرپورٹ پر تین روزہ ایوی ایشن سکیورٹی انسپکشن کامیابی سے مکمل کر لی۔

یہ ٹیم 8 جولائی سے 10 جولائی 2025 تک پاکستان میں موجود رہی اور اس دوران اسلام آباد ایئرپورٹ پر سکیورٹی کے مختلف شعبہ جات کا تفصیلی جائزہ لیا۔ انسپکشن کا مقصد ایئرپورٹ پر موجود ایوی ایشن سکیورٹی انتظامات کو بین الاقوامی معیار کے مطابق جانچنا تھا۔

افتتاحی اجلاس میں چیف سکیورٹی آفیسر سمیت ایئرپورٹ کے تمام متعلقہ اسٹیک ہولڈرز نے شرکت کی۔ بعد ازاں، انسپکشن ٹیم نے سکیورٹی ڈپلائمنٹ، داخلی کنٹرول، مسافروں و سامان کی سکریننگ، پاسز کے اجراء، گاڑیوں اور عملے کی جانچ، سی سی ٹی وی نظام، پیرامیٹر سکیورٹی، کیو آر ایف تعیناتی، ڈرون سے متعلق اقدامات اور ہنگامی صورتحال سے نمٹنے کی استعداد سمیت دیگر اہم سکیورٹی امور کا تفصیلی معائنہ کیا۔

انسپکشن کے اختتام پر ٹیم نے ائیرپورٹ سکیورٹی فورس (ASF) کی جانب سے کیے گئے حفاظتی اقدامات کو بین الاقوامی معیار کے مطابق اور اطمینان بخش قرار دیا۔ ٹیم نے ہوائی سفر کو محفوظ بنانے کے لیے ASF کی کاوشوں کو سراہتے ہوئے اسے قابلِ تحسین قرار دیا۔

ترجمان اے ایس ایف نے کہا کہ “یہ کامیابی نہ صرف ASF کی پیشہ ورانہ صلاحیتوں کا اعتراف ہے بلکہ عالمی سطح پر پاکستان کے ایوی ایشن سکیورٹی کے مؤثر نظام کی ایک اور سند ہے۔”