بیجنگ(شِنہوا)شمسی توانائی سے چلنے والے دنیا کے سب سے بڑے کار بردارجہاز ’’یوآن ہائی کو‘‘ نے کامیابی سے اپنا پہلا سفر مکمل کرلیا ہے اور یونان کی پیریئس بندرگاہ پر 4 ہزار چینی گاڑیاں لے کر پہنچا ہے۔
روزنامہ سائنس اینڈ ٹیکنالوجی کی رپورٹ کے مطابق چائنہ کوسکو شپنگ کارپوریشن لمیٹڈ نے اعلان کیا ہے کہ یہ جہاز 302.8 کلو واٹ کے شمسی نظام سے لیس ہے جو اپنی نوعیت کا سب سے بڑا نظام ہے۔ یہ نظام سالانہ 4 لاکھ 10 ہزار کلو واٹ آور بجلی پیدا کرتا ہے اور روایتی جہازوں کے مقابلے میں اپنی پوری زندگی میں کاربن کی شدت کو 35 فیصد تک کم کرتا ہے۔
کوسکو شپنگ سپیشلائزڈ کیریئرز کمپنی لمیٹڈ کے چیئرمین ژانگ وے نے کہا کہ ’یوآن ہائی کو‘ کا پہلا کامیاب سفر کوسکو شپنگ کی گلوبل چینل حکمت عملی میں آگے کی جانب ایک عملی قدم ہے جو جہاز رانی، بندرگاہوں اور نقل وحرکت کو مربوط کرتی ہے جبکہ عالمی جہاز رانی صنعت میں کم کاربن تبدیلی کے لئے ایک نیا معیار قائم کرتی ہے۔
یہ جہاز دوہرے ایندھن والے انجن سے لیس ہے جو مائع قدرتی گیس(ایل این جی) اور فیول آئل دونوں پر چلتا ہے۔ اس کی بدولت توانائی کے استعمال میں 20 فیصد کمی آتی ہے جبکہ کاربن کے اخراج میں 24 فیصد سے زائد کمی واقع ہوتی ہے۔ مثال کے طور پر چین سے یورپ کے ایک چکر میں کاربن کے اخراج میں 2 ہزار100 ٹن کی کمی آتی ہے۔