اسلام آباد(نیشنل ٹائمز) وفاقی وزیر داخہ محسن نقوی نے کہا ہے کہ ایران اسرائیل جنگ بندی میں وزیراعظم شہباز شریف کا بڑا کردار ہے اور اس جنگ بندی کے پیچھے بھی وردی ہے۔
اسلام آباد میں محرم سے متعلق تمام مکاتب فکرکے علمائے کرام سے گفتگو کرتے ہوئے محسن نقوی نے دنیا کو اتحاد کا پیغام دینے کےلیے 14 اگست کے دن فیصل مسجد میں تمام مکاتب فکر کے علما کو اکٹھے نماز ادا کرنے کی دعوت دی، انہوں نے محرم الحرام کے دوران یکجہتی پیدا کرنے میں کردار ادا کرنے کی بھی اپیل کی۔اس موقع پر وزیر داخلہ نےکہا کہ بھارت کے حملوں کے دوران پاکستان کو غیبی مدد ملی، بھارت نے ایک بیس پر 11 میزائل فائرکیے، وہاں ہمارے 9 یا 11 طیارے تھے مگر تمام میزائل بیس سے باہر گرے اور ہمارے کسی طیارے کونقصان نہیں پہنچا۔ انہوں نے کہا کہ ہم نہیں چاہتے تھے بھارت کی شہری آبادی پرحملہ کریں مگر پاکستان نے جب بھارت کی طرف میزائل فائر کیے ان میں ایک میزائل میں فائرکرتے وقت فرق آگیا، ہمیں پریشانی ہوئی کہ یہ میزائل تو آبادی پر گرجائےگا لیکن اللہ کی طرف سے مدد آئی اور وہی میزائل بھارت کے سب سے بڑے آئل ڈپوپرلگا، یہ دومثالیں غیبی مددکو بالکل ثابت کرتی ہیں۔ وزیر داخلہ کا کہنا تھا کہ بھارت کے حملے کے وقت آرمی چیف ڈٹ کر کھڑے تھے اور ان کا عزم تھا کہ بھارت کو چار گنا زیادہ بھگتنا پڑے گا۔ایران اسرائیلی جنگ سے متعلق گفتگو کرتےہوئے محسن نقوی نے کہا کہ ایران اسرائیل سیز فائر میں وزیراعظم کا بڑا کردار ہے، سیز فائر کے پیچھے وردی بھی ہے جب کہ عالمی رہنماؤں کو قائل کرنے میں بھی ہمارے لیڈرز کا بہت بڑا کردار ہے۔