وہاڑی (محمد یوسف بھٹی) گورنمنٹ بوائز ہائی سکول تیمور شہید کالونی کے ہیڈ ماسٹر پر اپنے ساتھیوں کے ہمراہ لیب اسسٹنٹ پہ تشدد اور حبس بے جا میں رکھنے کا مبینہ الزام، متاثرہ سابق لیب اسسٹنٹ عثمان عبدالحسیب اور ان کے بھائی نعمان احمد ایڈووکیٹ نے پولیس تھانہ سٹی میں دی گئی درخواست میں الزام عائد کیا کہ گورنمنٹ سکول تیمور شہید کالونی کے ہیڈ ماسٹر عامر محمود خان نے مبینہ طور پر لاکھوں روپے رشوت لیتے ہوئے عارضی لیب اسسٹنٹ کو سکول میں نوکری پر رکھ لیا جبکہ سابق ایل اے عثمان کو جھوٹی اور بے بنیاد انکوائریوں میں پھنسا کر نوکری سے فارغ کروا دیا۔
عثمان عبدالحسیب کئی سالوں سے انکوائریاں بھگت رہا ہے جبکہ ہیڈ ماسٹر اب بھی ہم سے مبینہ نوکری دلوانے کیلئے تین لاکھ روپے طلب کر رہا ہے۔ گزشتہ روز عثمان سکول سے انکوائری کیلئے درکار اپنے کیس کے کاغذات لینے گیا تو ہیڈ ماسٹر نے دیگر ساتھیوں کے ہمراہ اسے مبینہ تشدد کا نشانہ بناتے ہوئے کئی گھنٹے سٹور روم میں قید رکھا۔
انہوں نے جلاد ہیڈ ماسٹر کے خلاف وزیر اعلی پنجاب، وزیر تعلیم اور سیکرٹری ایجوکیشن سمیت دیگر حکام سے فوری نوٹس لے کر مقدمہ درج کرنے، محکمانہ کارروائی اور انصاف فراہم کرنے کی اپیل کی ہے۔
