کوئٹہ(نیشنل ٹائمز) ریکودک مائننگ کمپنی (آر ڈی ایم سی) ریکودک پراجیکٹ کے پہلے مرحلے کی تعمیر کے لیے 3 ارب امریکی ڈالر تک کی پروجیکٹ فنانسنگ حاصل کرنے کی کوششوں میں مسلسل پیشرفت کر رہی ہے۔ریکوڈک مائنگ کمپنی کی پریس ریلیز کے مطابق اس فنانسنگ میں مختلف عالمی ادارے شامل ہیں جن میں انٹرنیشنل فنانس کارپوریشن (آئی ایف سی )، انٹرنیشنل ڈویلپمنٹ ایسوسی ایشن (آئی ڈی اے)، ایشیائی ترقیاتی بینک ( اے ڈی بی )، امریکی ڈیولپمنٹ فنانس کارپوریشن ( ڈی ایف سی )، یو ایس ایکسپورٹ-امپورٹ بینک ( یو ایس ایگزم )، کینیڈا کا ایکسپورٹ ڈویلپمنٹ بینک ( ای ڈی سی )، جرمنی کے ایولر ہرمیز اور کے ایف ڈبلیو بینک، سویڈن کا ایکسپورٹ کریڈٹ ایجنسی ( ای کے این ) اور فن لینڈ کا فنویرا (Finnvera) شامل ہیں،ساتھ ہی ایک کمرشل بینک کا حصہ بھی ہوگا۔ آر ڈی ایم سی اس بات پر کاربند ہے کہ 2025 کی دوسری ششماہی میں فنانس دستاویزات پر دستخط اور ابتدائی رقم کی دستیابی کو ممکن بنایا جائے۔اسی سلسلے میں آر ڈی ایم سی 12 جون 2025 کو آئی ایف سی اور آئی ڈی اے کی جانب سے 700 ملین امریکی ڈالر کے براہِ راست قرض کی منظوری کا خیرمقدم کرتی ہے جو دونوں اداروں کے مشترکہ بورڈ اجلاس میں دی گئی۔ پراجیکٹ سے پہلی پیداوار کا ہدف بدستور 2028 کے آخر میں رکھا گیا ہے۔