برسلز (نیشنل ٹائمز) چیئرمین پاکستان پیپلز پارٹی و رکنِ قومی اسمبلی بلاول بھٹو زرداری کی قیادت میں ایک اعلیٰ سطحی پارلیمانی وفد نے یورپین ایکسٹرنل ایکشن سروس (EEAS) کی سیکرٹری جنرل بیلن مارٹنز کاربونل (Belén Martínez Carbonell) سے اہم ملاقات کی۔

ملاقات میں علاقائی سلامتی، بین الاقوامی آبی وسائل، اور پاک-یورپی یونین تعلقات پر تفصیلی تبادلہ خیال کیا گیا۔چیئرمین بلاول بھٹو زرداری نے جنوبی ایشیا میں بگڑتے ہوئے سیکیورٹی ماحول اور بھارت کے حالیہ یکطرفہ اقدامات کے تناظر میں یورپی یونین کی قیادت کو بریفنگ دی۔ انہوں نے بھارت کی جانب سے کیے گئے جارحانہ اور غیر ذمہ دارانہ اقدامات پر پاکستان کی شدید تشویش کا اظہار کیا۔

وفد نے واضح کیا کہ بھارت ایک جھوٹے بیانیے کے ذریعے حقائق کو مسخ کر رہا ہے، جو نہ صرف علاقائی امن بلکہ عالمی سطح پر بھی خطرات کو جنم دے رہا ہے۔ اس دوران وفد نے بھارت کی جانب سے سندھ طاس معاہدے کی خلاف ورزی اور اس کی ممکنہ معطلی پر بھی پاکستان کے تحفظات پیش کیے۔پارلیمانی وفد نے اس بات پر زور دیا کہ بین الاقوامی آبی وسائل کو سیاسی ہتھیار بنانا عالمی اصولوں کی خلاف ورزی ہے، جو نہ صرف جنوبی ایشیا کے ماحولیاتی نظام بلکہ عالمی آبی سفارت کاری کے اصولوں کی سالمیت کے لیے بھی خطرناک ہے۔

دونوں فریقین نے یورپی یونین-پاکستان اسٹریٹجک انگیجمنٹ پلان کے تحت خارجہ پالیسی اور سلامتی کے شعبوں میں تعاون کو مزید مضبوط بنانے پر اتفاق کیا۔ ملاقات میں جاری ڈائیلاگ کے دائرہ کار کو وسعت دینے اور باہمی شراکت داری کو مزید مؤثر بنانے کی ضرورت پر بھی زور دیا گیا۔