برسلز (نیشنل ٹائمز) سابق وزیر خارجہ اور چیئرمین پاکستان پیپلز پارٹی بلاول بھٹو زرداری کی قیادت میں پاکستانی پارلیمانی وفد نے یورپ کے ممتاز تھنک ٹینک ایگمونٹ رائل انسٹیٹیوٹ فار انٹرنیشنل ریلیشنز کا دورہ کیا۔ انسٹیٹیوٹ کے ڈائریکٹر جنرل ایمبیسڈر پال ڈی وِٹ (Ambassador Pal De Witte) نے وفد کا پرتپاک خیرمقدم کیا۔

ایگمونٹ انسٹیٹیوٹ میں خطاب کرتے ہوئے چیئرمین بلاول بھٹو زرداری نے جنوبی ایشیا میں امن و امان کی حالیہ مخدوش صورتحال اور خطے کو درپیش سیکورٹی و انسانی چیلنجز پر مفصل تجزیہ پیش کیا۔

انہوں نے پاکستان کے قیامِ امن کے لیے تعمیری اور سفارتی کردار کو اجاگر کرتے ہوئے واضح کیا کہ پاکستان خطے میں پرامن بقائے باہمی، بین الاقوامی قوانین کی پاسداری، اور تنازعات کے پرامن حل کا بھرپور حامی ہے۔

چیئرمین بلاول بھٹو زرداری نے کہا کہ جنوبی ایشیا میں پائیدار امن کے قیام کے لیے بین الاقوامی برادری کی شمولیت اور ذمے دارانہ کردار ناگزیر ہے۔ پاکستان اس مقصد کے لیے عالمی پلیٹ فارمز پر مسلسل آواز بلند کرتا رہے گا۔

ایگمونٹ انسٹیٹیوٹ کی جانب سے پاکستان کے کردار کو سراہا گیا اور علاقائی و عالمی امور پر مکالمے کو فروغ دینے کے لیے مستقبل میں بھی باہمی رابطے جاری رکھنے پر اتفاق کیا گیا۔