اسلام آباد(نیشنل ٹائمز)بھارتی میڈیا کے مطابق یہ واقعہ دارالحکومت نئی دہلی کے سرکاری اسپتال بابا صاحب امبیڈکر میں پیش آیا جہاں سونیا نامی خاتون کو ڈیلیوری کیلئے لایا گیا تھا۔رپورٹس کے مطابق نومولود کے انتقال پر سونیا کے گھر والے طیش میں آگئے اور انہوں نے بچے کی موت کا ذمہ دار خاتون ڈاکٹر کو ٹھہراتے ہوئے اسے اسپتال میں ہی بدترین تشدد کا نشانہ بنایا۔خاتون ڈاکٹر اسپتال میں اپنی ڈیوٹی انجام دے رہی تھیں کہ اتنے میں 4 سے 5 خواتین آئیں اور ڈاکٹر پر حملہ کرتے ہوئے اسے مارنے پیٹنے لگیں، ڈاکٹر کے بال بھی کھینچے، کپڑے پھاڑنے کی کوشش بھی کی، ڈاکٹر کے سیٹس اسکوپ سے ہی گلا گھونٹنے کی کوشش بھی کی۔پولیس کے مطابق واقعے کا نوٹس لیتے ہوئے مقدمہ درج کرلیا اور ڈاکٹر کو تشدد کا نشانہ بنانے والی خواتین کیخلاف کارروائی شروع کردی ہے۔اس کے علاوہ ڈاکٹرز کی تنظیم کی جانب سے اسپتال کے ڈائریکٹر کو خط لکھتے ہوئے واقعے کی مذمت کی گئی اور اسپتال میں موجود سکیورٹی گارڈز کو نوکری سے فارغ کرنے کی درخواست کی گئی ہے۔