برسلز (نیشنل ٹائمز) یورپی یونین، بیلجیئم اور لکسمبرگ کے لیے پاکستان کے سفیر رحیم حیات قریشی نے برسلز میں بیلجیئم کے لیے جاپان کے سفیر جناب مساھیرو مکامی (Masahiro Mikami) اور روس کے سفیر جناب الیکسنڈر ٹوکوونین (Aleksandr Tokovinin) سے علیحدہ علیحدہ ملاقاتیں کیں۔

ان ملاقاتوں کے دوران اہم عالمی و علاقائی امور پر تفصیلی تبادلہ خیال کیا گیا۔ سفیر پاکستان نے دونوں ہم منصبوں کو جنوبی ایشیا میں امن و سلامتی کی بگڑتی ہوئی صورتحال پر بریفنگ دی، جس کی بنیادی وجہ بھارت کے جارحانہ رویے کو قرار دیا گیا۔

رحیم حیات قریشی نے اس بات پر زور دیا کہ بھارت کے غیر ذمہ دارانہ اقدامات نہ صرف خطے کے امن کے لیے خطرہ ہیں بلکہ عالمی سطح پر بھی ان کے منفی اثرات مرتب ہو سکتے ہیں۔ انہوں نے عالمی برادری پر زور دیا کہ وہ خطے میں دیرپا امن کے قیام کے لیے اپنا مؤثر کردار ادا کرے۔

ملاقاتوں کا مقصد دوطرفہ تعلقات کو مزید مستحکم کرنا اور بین الاقوامی تعاون کو فروغ دینا تھا۔