اسلام آباد(نیشنل ٹائمز)پی ٹی آئی کے سیکرٹری جنرل سلمان اکرم راجہ نے گزشتہ روزا سلام آبادہائیکورٹ میں میڈیا نمائندوں سے گفتگو کرتے ہوئے بانی پی ٹی آئی عمران خان کی جانب سے کسی بھی قسم کی معافی کو ناممکن قراردیتے ہوئے کہا تھا کہ بانی پی ٹی آئی کوئی معافی نہیں مانگیں گے، کوئی سمجھتا ہے عمران خان معافی مانگیں گے تو اس کا کوئی امکان نہیں ہے۔سلمان اکرم راجہ کے بیان پر جیو نیوز کے پروگرام’ آج شاہ زیب خانزادہ کے ساتھ‘ میں بات کرتے ہوئے وزیر مملکت طلال چوہدری نے کہا کہ کسی کو معافی دینے یا دلوانے کے لیے یا این آر او کے لیے بات چیت نہیں ہو گی۔انہوں نے کہا کہ پی ٹی آئی اسٹیبلشمنٹ پر حملہ آور ہوئی، اس میں معافی کافی نہیں ہوگی بلکہ سزائیں بھی ہوں گی۔دوسری جانب طلال چوہدری نے قومی سلامتی کا اجلاس دوبارہ بلانے کی بلاول بھٹو کی تجویز پر کہا کہ ہم چاہیں گے پی ٹی آئی قومی سلامتی پر ہمارے ساتھ بیٹھے اور اپنا کردار ادا کرے لیکن کسی کی بلیک میلنگ سے یہ جنگ روکی نہیں جا سکتی۔ایک سوال کے جواب میں انہوں نے کہا کہ محسن نقوی طبیعت کی خرابی کے باعث کچھ اجلاسوں میں شرکت نہیں کر سکے۔