کراچی (نیشنل ٹائمز) ایم کیوایم پاکستان کے رہنماء ڈاکٹرفاروق ستار نے کہا ہے کہ اگر پیپلزپارٹی گورنر کا استعفی مانگ سکتی ہے تو ایم کیو ایم بھی صدر کا استعفی مانگ سکتی ہے۔ ایک نجی ٹی وی سے گفتگو کرتے ہوئے فاروق ستار نے کہا کہ پیپلز پارٹی رہنمائوں نے اصل مدعے سے ہٹ کر بات کی، لگتا ہے ایم کیو ایم کی پریس کانفرنس پی پی کو لگی بھی اور چھبی بھی ہے۔پیپلزپارٹی رہنمائو ں کی جانب سے گورنر سندھ کامران ٹیسوری کے استعفے کے مطالبے کے حوالے سے فاروق ستار نے کہا کہ پی پی والے میچور لوگ ہوتے تو اصل ایشو پر عدالتی فیصلے پر بات کرتے۔ فاروق ستار کا کہنا تھا کہ گورنر سندھ کامران ٹیسوری قابل قبول بھی ہیں اور مقبول بھی ہیں، کامران ٹیسوری ایک عوامی گورنرکی حیثیت رکھتے ہیں۔انھوں نے کہا کہ گورنر کا پوچھنا ہے تو مفت آئی ٹی تعلیم حاصل کرنیوالے 50 ہزار بچوں سے پوچھیں، کامران ٹیسوری کے بارے میں مختلف مکاتب فکر کے علما اور کاروباری حضرات سے پوچھیں۔ڈاکٹرفاروق ستار نے کہا کہ گورنرکاسندھ کے بارے میں عوام سے پوچھیں جن کیلئے انھوں نے بلاامتیاز خدمت کی، گورنر کے کاموں کی تو پی پی کے کئی وزرا اور رہنما بھی تعریف کرتے ہیں۔