اسلام آباد (نیشنل ٹائمز)وزیراعظم محمد شہباز شریف نے کہاہے کہ ملکی معیشت میں ایف بی آر کا کلیدی کردار ہے ،ہمیں مل جل کر ملکی ترقی کے لیے کام کرنا ہے ۔ وزیر اعظم کی زیر صدارت جمعہ کو وزیر اعظم ہائوس اسلام آباد میں فیڈرل بورڈ آف ریونیو (ایف بی آر) کے امور پر اہم اجلاس منعقد ہوا۔وزیر اعظم کو بریفنگ میں بتایا گیا کہ ایپیلیٹ ٹریبیونلز ان لینڈ ریونیو کے قیام کے حوالے سے کام کو آغاز ہو چکا ہے ۔ ان ٹریبیونلز میں ججز کی تعیناتی کے حوالے سے شفاف تحریری امتحان کا انعقاد کیا جائے گا ۔اجلاس کے شرکا سے گفتگو کرتے ہوئے وزیر اعظم نے کہا کہ ملکی معیشت میں ایف بی آر کا کلیدی کردار ہے ۔ انہوں نے کہا کہ ہمیں مل جل کر ملکی ترقی کے لیے کام کرنا ہے ۔انہوں نے ہدایت کی کہ ایف بی آر کے مختلف عدالتوں اور ٹریبونلز میں زیر التوا کیسز کے حوالے سے بہترین وکلا کی خدمات حاصل کی جائیں ۔انہوں نے کہا کہ ایف بی آر میں جاری اصلاحات اور محصولات کے حوالے سے ہفتہ وار جائزہ اجلاس کی صدارت خود کروں گا۔ انہوں نے ہدایت کی کہ ٹیکس سے متعلق مقدمات کو جلد نمٹانے کیلئے ان لینڈ ریونیو ایپیلیٹ ٹریبیونلز کے ساتھ کسٹمز ایپیلیٹ ٹریبیونلز کا قیام بھی عمل میں لایا جائے۔وزیراعظم نے ایف بی آر کے اچھی کارکردگی دکھانے والے افسران کے لیے اعزاز دینے کے حوالے سے حکمت عملی ترتیب دینے کی ہدایت بھی کی۔