اسلا م آباد (نیشنل ٹائمز)قومی اسمبلی میں اپوزیشن لیڈر عمر ایوب نے کہا ہے کہ مذاکرات شروع ہوئے تو سب سے پہلے عمران خان کو رہا کرانا ترجیح ہوگی۔ ایک نجی ٹی وی سے گفتگو کرتے ہوئے عمر ایوب کا کہنا تھا کہ ہم اس دن کا شدت سے انتظار کر رہے ہیں کہ بانی پی ٹی آئی اسمبلی میں آئیں، وہ نہ صرف اپوزیشن کولیڈ کریں بلکہ وزیراعظم کی کرسی پر بھی بیٹھیں گے۔اپوزیشن لیڈر کا کہنا تھا کہ بانی پی ٹی آئی کے خط کے منتظر ہیں، مذاکرات شروع ہوئے تو پھر معاملے کو دیکھیں گے، سب سے پہلے بانی پی ٹی آئی کو رہا کرانا ترجیح ہوگی اور اس کے بعد جتنے بھی سیاسی اسیران ہیں ان کو رہا کرانا مقصد ہوگا۔عمر ایوب کا کہنا تھا کہ عالیہ حمزہ کے گھر کے سامنے قیدی وین کھڑی کر کے اس گھر میں توڑ پھوڑ کی گئی، امجد خان نیازی کو رہا کرکے دوبارہ دوسرے کیسز میں گرفتار کر رہے ہیں، یہ حالات ہیں تحریک انصاف کے ساتھ جس کی ہم مذمت کرتے ہیں۔انہوں نے بتایا کہ آج صبح 7 بج کر 55 منٹ پر سرگودھا عدالت کے سامنے موجود تھے، پولیس نے جگہ جگہ ناکے لگا رکھے تھے، ہمیں انسداد دہشتگردی عدالت میں جانے نہیں دیا گیا، ہم بڑی مشکل سے گیٹ پر پہنچنے، ہم نے گیٹ کھٹکٹھایا تو کہا گیا کہ سیکیورٹی الرٹ ہے۔انہوں نے دعوی کیا کہ عدالت کے اندرجج صاحب یرغمال لگ رہے تھے۔ان کا مزید کہنا تھا کہ ضمانتیں عدم پیروی کی وجہ سے منسوخ کردیں حالانکہ ہم وہیں موجود تھے۔