اسلام آباد (نیشنل ٹائمز)پاکستان تحریک انصاف کے ترجمان رئوف حسن نے کہا ہے کہ ججز قانونی تقاضے پورے کرنے کے بجائے سیاسی کمنٹس دے رہے ہیں، جس چیز کی بانی پی ٹی آئی پر پابندی ہے وہ کام ججز کیوں کر رہے ہیں، سیاسی جماعتوں سے ڈائیلاگ کیلئے کوئی کمیٹی نہیں بنائی گئی، تین سیاسی جماعتوں سے ڈائیلاگ نہیں ہوں گے جنھوں نے مینڈیٹ چوری کیا ۔نجی ٹی وی سے گفتگو کرتے ہوئے رئوف حسن نے کہا کہ تمام ادارے آئینی حدود میں کام کریں تو پاکستان ٹھیک ہوسکتا ہے، کچھ ادارے قانون سے ماورا کردار ادا کر رہے ہیں، عدالت میں ججز نے سیاسی کمنٹ دیئے ، ججز کو چاہیے قانون کے تقاضے پورے کریں اور فیصلہ دیں۔ پی ٹی آئی رہنما نے کہا کہ سیاسی جماعتوں سے ڈائیلاگ کیلئے کوئی کمیٹی نہیں بنائی گئی، تین سیاسی جماعتوں سے ڈائیلاگ نہیں ہوں گے جنہوں نے مینڈیٹ چوری کیا۔رئوف حسن نے کہا کہ حکومت کے پاس فیصلہ سازی کی طاقت نہیں، اسٹیبلشمنٹ نہ چاہتی تو یہ کبھی حکومت میں آہی نہیں سکتے تھے، ان کے پاس تجویز لے کر جائیں گے تو یہ ان سے ہی پوچھیں گے کہ کیا کریں، کیوں نہ ہم خود ان سے بات کریں۔