اسلام آباد (نیشنل ٹائمز) پاکستان انٹرنیشنل ایئرلائنز (پی آئی اے) کی نجکاری کے سلسلے میں 6 کمپنیوں و کنسورشیمز کو پری کوالیفائی کر لیا گیا۔ تفصیل کے مطابق وفاقی وزیر نجکاری، سرمایہ کاری اور مواصلات عبدالعلیم خان کی زیر صدارت نجکاری کمیشن بورڈ کا اجلاس اسلام آباد میں منعقد ہوا۔اجلاس میں فیصلہ کیا گیا کہ پری کوالیفائیڈ کمپنیاں و کنسورشیمز پی آئی اے کی بولی میں حصہ لے سکیں گی۔پری کوالیفائی کرنے والی کمپنیوں و کنسورشیمز میں ایئر بلو، عارف حبیب کارپوریشن، بلیو ورلڈ سٹی، فلائی جناح، پاک ایتھنول کنسورشیم اور وائی بی ہولڈنگز کنسورشیم شامل ہیں۔وفاقی وزیر نجکاری عبدالعلیم خان نے اجلاس میں گفتگو میں کہا کہ خسارے میں چلنے والے تمام اداروں کی شفاف اور تیز نجکاری یقینی بنائی جائے گی۔اس ساتھ ساتھ انہوں نے ہدایت کی کہ نجکاری میں حصہ لینے والے اداروں کے ٹیکنیکل اور مالیاتی استحکام کو ضرور مدنظر رکھا جائے۔انہوں نے ہدایت کی کہ نجکاری کے عمل کو میڈیا پر لائیو دکھائیں تاکہ کسی کو کوئی اعتراض نہ رہے۔