اسلام آباد (نیشنل ٹائمز )وفاقی وزیر برائے منصوبہ بندی و ترقی احسن اقبال نے کہا ہے کہ پاک سیٹ ایم ایم ون سیٹلائٹ سے آزاد کشمیر اور گلگت بلتستان کو انٹرنیٹ سروس ملے گی۔اسلام آباد میں احسن اقبال کی وزیراعظم آزاد جموں و کشمیر چوہدری انوار الحق سے ملاقات ہوئی جس میں بجٹ اور آزاد جموں و کشمیر میں ترقیاتی کاموں کے بارے میں بات چیت کی گئی۔اس موقع پر احسن اقبال نے کہا کہ پاک سیٹ ایم ایم ون سیٹلائٹ سے اے جے کے اورجی بی کو انٹرنیٹ سروس کی سہولت فراہم ہوگی، یہ سیٹلائٹ سپارکو کی ایک بڑی کامیابی ہے، ہمیں اس سروس سے تعلیم اور صحت کے شعبوں میں بھرپور فائدہ اٹھانے کی ضرورت ہے۔وفاقی وزیر منصوبہ بندی و ترقی نے کہا کہ حکومت کو احساس ہے کہ جی بی اور اے جے کے حساس علاقے ہیں، آزاد کشمیر کے ساتھ مقبوضہ کشمیر ہے ہمیں آزاد کشمیر کو بطور ماڈل دنیا کو دکھانا ہے، آزاد جموں و کشمیر میں بھی نوجوانوں کا انٹرنشپ پروگرام ینگ ڈویلپمنٹ فیلو شروع کریں، نوجوان اس خطے کا روشن مستقبل ہیں۔انہوں نے کہا کہ آزاد کشمیر میں ہمیں سیاحت کو فروغ دینے کی ضرورت ہے، سیاحتی مقام کو باقاعدہ پلاننگ کے ساتھ انفراسٹرکچر کریں، آزاد جموں کشمیر کے ترقیاتی کاموں کے لئے حکومت خاص اقدامات کر رہی ہے۔