ساہیوال(نیشنل ٹائمز) جماعت اسلامی ساہیوال کے رہنمائوں نے کہا ہے کہ پاکستان حماس کی حکومت کو تسلیم کرے اورفلسطین میں بچوں، بیٹیوں کا قتل عام نہیں دیکھ سکتے، اسلامی دنیا کے حکمران بے حمیتی کا راستہ اختیار کرنے کی بجائے امت کے جذبات کی حقیقی ترجمانی کریںپاکستان حکومت اسرائیل کو واضح پیغام دے دیں کہ بہت ہوگیا۔ اسلام آباد میں فلسطین کی صورتحال پر اسلامی دنیا کے سربراہان کا اجلاس بلایا جائے۔ ان خیالات کا اظہار جماعت اسلامی کے امیر طیب محمود بلوچ’ ڈاکٹر سراج سید حزیفہ بخاری اور میاں رفیق رشید نے جمعہ کو فلسطینیوں کے حق میں احتجاجی مظاہر ے سے خطاب کرتے ہوئے کیا ۔ لیاقت چوک میں ہونے والے مظاہرے میں شرکاء نے فلسطینیوں کے حق میں اسرائیل کے خلاف نعرے بازی کی اوراسرائیلی جارجیت کی مذمت کی گئی ۔اس موقع پر خطاب کرتے ہوئے مقررین نے مزید کہا کہ غزہ میں چالیس ہزار افراد شہید کردیے گئے، رفح میں انسانی المیہ پیدا ہوچکا ہے، ثابت ہوگیا اقوام متحدہ بے بس ادارہ ہے، مسلم ممالک کو اپنے آپ کو فلسطینیوں کے لیے بڑی تحریک کے لیے تیار کرنا ہوگا، مسجد اقصی کی آزادی کے لیے جدوجہد تیز کرنا ہے،غزہ میں اسرائیل کی تازہ ترین سفاکیت کی شدید الفاط میں مذمت کرتے ہیں۔یاد رہے 31مئی کو جماعت اسلامی کے تحت اسرائیلی مظالم کے خلاف ملک گیر یوم احتجاج منایا گیا جس کا مقصد عوام کی جانب سے فلسطینیوں سے اظہار یکجہتی کرنا اور اسلام آبادمیں بیٹھے حکمرانوں کو جگانا تھا ۔ مقررین کا کہنا تھا کہ اسرائیل نے ثابت کردیا کہ وہ کسی عالمی قانون کو تسلیم نہیں کرتا، غزہ پر مسلمان حکمرانوں اور عوام میں واضح تقسیم ہے۔