اسلام آباد (نیشنل ٹائمز)وفاقی وزیر پٹرولیم سینیٹر مصدق ملک نے کہا ہے کہ وفاقی بجٹ سے پہلے ہمیں پٹرول پر جی ایس ٹی کے نفاذ کا فیصلہ کرنا ہے ۔نجی ٹی وی پروگرام میں گفتگو کرتے ہوئے انہوں نے کہا کہ آئی ایم ایف کا مطالبہ ہے کہ آمدنی کا ہدف پورا کریں ، کیسے کرنا ہے یہ ہمارا کام ہے ،حکومت کو اس وقت پورا اعتمادہے کہ ہم صحیح سمت جارہے ہیں۔آئی ایم ایف، ورلڈ بینک، ایشیائی ترقیاتی بینک اور دیگر عالمی اداروں کی جانب سے مثبت اشارے مل رہے ہیں،اسٹاک مارکیٹ روز ریکارڈ بنا رہی ہے، معیشت درست سمت پر گامزن ہے۔انہوں نے کہا کہ بیرونی سرمایہ کاروں کا پاکستان پر اعتماد بحال ہورہاہے۔ہمارے اپنے تاجروں اور سرمایہ کاروں کااعتماد بھی بہتر ہورہا ہے۔معاشی طور پر سمت بہتر ہوتی چلی جارہی ہے۔دوسری جانب پیٹرولیم ڈویژن نے بجٹ میں 260 ارب روپے مختص کرنے کا مطالبہ کردیا ہے ، آر ایل این جی گھریلو شعبے کی جانب موڑنے کی وجہ سے ڈھیر لگ جانے والے گردشی قرضے کا خاتمہ کیا جائیگا۔