مکہ مکرمہ (نیشنل ٹائمز )خانہ کعبہ کے مرکزی دروازے اور حجراسود کا خول تیار کرنے والی کمپنی کے مالک محمد عاشق حسین انتقال کرگئے۔ میڈیا رپورٹس کے مطابق محمد عاشق کا تعلق پاکستان کے احمد پور شرقیہ، ضلع بہاولپور سے تھا ان کے والد کا نام ملک غلام قادر تھا ان کے والد بھی بہاولپور کے نواب صادق محمد عباسی کے محل میں سنار کا کام کرتے تھے۔محمد عاشق کے والد نے ان کو 1970 میں مدینہ بھیجا تھا مدینہ منورہ میں انھوں نیبطور چرواہا نوکری کی لیکن بعد میں محمد عاشق کا شمار سعودی عرب میں سونے کے بڑے تاجروں میں ہونے لگا۔ محمد عاشق نے خانہ کعبہ کے مرکزی دروازے کی تنصیب اپنے ہاتھوں سے کی تھی ، 200 کلو سونے سے بنے بیت اللہ شریف کے دروازے کی تعمیر و تنصیب کی سعادت ان کی کمپنی کو حاصل ہوئی۔ خانہ کعبہ کی چھت سے بارش کے پانی کو نیچے لانے کیلئے رحمت کا پرنالہ بھی محمد عاشق کی کمپنی نے ہی تیار اور تنصیب کیا۔ محمد عاشق نے بتایا تھا کہ 1978 میں سعودی حکومت نے بیت اللہ شریف کے مرکزی دروازے کو تبدیل کرنے کا کام ایک لبنانی کمپنی کو دیا تھا جس نے بیت اللہ شریف کا دروازہ ڈیزائن کیا تھا۔