لندن (نیشنل ٹائمز )برطانیہ کے وزیراعظم رشی سوناک نے 4 جولائی کو عام انتخابات کے انعقاد کا اعلان کرتے ہوئے کہا ہے کہ برطانوی عوام ووٹ کے ذریعے اپنے مستقبل کا انتخاب کریں گے۔غیرملکی خبررساں ادارے کے مطابق رشی سوناک نے ڈائوننگ سٹریٹ میں اپنے دفتر کے باہر پریس کانفرنس میں اعلان کیا، جس کے ساتھ ہی تمام چہ مگوئیاں ختم ہوگئیں کہ وہ نئے انتخابات کا اعلان کب کریں گے۔لندن میں بارش کے دوران اپنے اعلان میں انہوں نے کہا کہ برطانوی عوام کے لیے اپنے مستقبل کے انتخاب کا یہی وقت ہے اور خود کو استحکام سے جوڑتے ہوئے کہا کہ استحکام اور غیرمعروف لیبر پارٹی کے رہنما کیئر سٹارمر میں سے کسی کو چننے کا موقع ہے۔رشی سوناک نے کہا کہ اگلے چند ہفتوں میں میں ایک،ایک ووٹ کے لیے جدوجہد کروں گا، میں اعتماد حاصل کروں گا اور آپ کو ثابت کرکے دکھائوں گا کہ میری قیادت میں صرف کنزرویٹو پارٹی کی حکومت ہی بڑی محنت سے حاصل کیا گیا ،معاشی استحکام خطرے سے دوچار ہونے نہیں دے گی ۔برطانوی وزیراعظم نے لیبرپارٹی پر تنقید کرتے ہوئے کہا کہ سٹارمر آسان راستہ اپناتا ہے اور ان کے پاس کوئی منصوبہ نہیں جس کے نتیجے میں ان کے ساتھ مستقبل صرف غیرواضح ہوسکتا ہے۔رشی سوناک نہ صرف انتخابات سے قبل ہونے والے سرویز میں بھی لیبر پارٹی سے بہت پیچھے ہیں بلکہ وہ اپنی پارٹی میں محدود ہوگئے ہیں کیونکہ ان کا مشیروں کی ایک چھوٹی ٹیم پر انحصار بڑھ رہا ہے، جس کے ساتھ وہ انتخابی مہم چلائیں گے۔