اسلام آباد(نیشنل ٹائمز ) الیکٹرانک کرائم ایکٹ پر سیاسی مفاہمت پیدا کرنے کے لیے وزیر اعظم شہباز شریف کی جانب سے سیاسی کمیٹی تشکیل دے دی گئی جس کے چیئرمین رانا ثنا اللہ ہوں گے۔اس ضمن میں وزیر اعظم آفس کی جانب سے باقاعدہ نوٹی فکیشن جاری کردیا گیا ہے جس کے مطابق کمیٹی میں اعظم نذیر تارڑ، عطااللہ تارڑ، خالد مقبول صدیقی، شیزا فاطمہ، نوابزادہ خالد حسین مگسی، شیری رحمن اور اٹارنی جنرل شامل ہیں۔نوٹیفکیشن میں کہا گیا ہے کہ کمیٹی کی سفارش پر دیگر افراد کو بھی اس کا حصہ بنایا جاسکتا ہے۔کمیٹی، الیکٹرانک کرائم ایکٹ کے حوالے سے سیاسی مفاہمت پیدا کرنے کی کوشش کرے گی اور بل میں ترامیم کے حوالے سے بھی سفارشات مرتب کرے گی۔وزارت اطلاعات اور ٹیلی کمیونیکیشن سیکریٹریٹ کمیٹی کی معاونت کریں گے جبکہ کمیٹی کی سفارشات 15 روز میں وزیرا عظم کو پیش کی جائیں گی۔