تہران(نیشنل ٹائمز)ایران کے صوبے مشرقی آذربائیجان میں ہیلی کاپٹر حادثے کا شکار ہونے والے ایرانی حکام کی لاشیں جائے وقوعہ سے منتقل کرنے کی ویڈیو سوشل میڈیا پر وائرل ہو گئی۔سوشل میڈیا پر حادثے کا شکار ہونے والے ہیلی کاپٹر کی ایک اور ویڈیو منظر عام پر آئی ہے جس میں ریسکیو ٹیموں کے اہلکاروں کو ہیلی کاپٹر حادثے میں جاں بحق افراد کی لاشوں کو اسٹریچر پر رکھ کر محفوظ مقام پر منتقل کرتے دیکھا جا سکتا ہے۔ویڈیو میں ریسکیو اہلکاروں کو جنگل میں دشوار گزار راستے سے لاشوں کو منتقل کرتے دیکھا جا سکتا ہے۔ یاد رہے کہ ایران کے صدر ابراہیم رئیسی کے ہیلی کاپٹر کو حادثہ گزشتہ روز تبریز شہر سے 100کلو میٹر دور پیش آیا تھا، حادثے کے وقت ہیلی کاپٹر میں ایران کے وزیر خارجہ حسین عامر عبد الہیان، گورنر تبریز اور ایران کے سپریم لیڈر آیت اللہ علی خامنہ ای کے ترجمان سمیت دیگر اعلی حکام بھی سوار تھے۔ایرانی میڈیا نے ہیلی کاپٹر حادثے میں صدر ابراہیم رئیسی، وزیر خارجہ حسین عامر عبدالہیان اور گورنر تبریز کے جاں بحق ہونے کی تصدیق کر دی ہے۔دوسری جانب ہلال احمر ایران کے سربراہ نے ہیلی کاپٹر حادثے میں جاں بحق ہونے والے کچھ افراد کی لاشوں کو ناقابل شناخت قرار دیا ہے۔