اسلام آباد(نیشنل ٹائمز ) اضافی مخصوص نشستوں پرمنتخب اراکین کی معطلی کے بعد تنخواہوں اورمراعات کو روک دیا گیا۔ اضافی مخصوص نشستوں پرمنتخب اراکین کوپارٹی فہرست سے نکال دیا گیا ہے جبکہ قومی اسمبلی سیکرٹریٹ نے معطل اراکین کی تنخواہیں اورمراعات کو روک دیا ہے۔ن لیگ 14، پیپلزپارٹی 5 اور جے یو آئی کے 3 معطل اراکین کی تنخواہ اور مراعات روکی گئی ہیں۔ذرائع کے مطابق سیکرٹری آفس نے فنانس ڈپارٹمنٹ کو ہدایات جاری کردی ہیں، معطل اراکین کے ڈپلومیٹ پاسپورٹس پر بیرون ملک سفر پر بھی پابندی عائد کردی گئی ہے۔ذرائع کا کہنا ہے کہ ٹریولنگ واچرز اور ایئر ٹریولنگ بزنس کلاس ٹکٹس کی سہولت بھی روک لی گئی جب کہ قومی اسمبلی سیکرٹریٹ نے اراکین سے متعلق نئی فہرستیں جاری کردی ہیں۔خیال رہے کہ قومی اسمبلی میں مسلم لیگ ن کے اراکین کی تعداد 107 ہوگئی ہے جب کہ پیپلزپارٹی اراکین کی تعداد 67 اور ایم کیوایم کی تعداد 21 ہوگئی۔اسی طرح جے یو آئی کے اراکین کی تعداد 8 اور آئی پی پی کی 4 رہ گئی جب کہ مسلم لیگ ق کے اراکین کی تعداد 5 ہوگئی۔