اسلام آباد(نیشنل ٹائم)آج سے پہلے کسی پوڈ کاسٹ میں نظر نہ آنے والے شاہد آفریدی نے جیو نیوز کے اولین پوڈ کاسٹ میں خصوصی مہمان کی حیثیت سے شرکت کی ہے۔شاہد آفریدی نے جیو پوڈ کاسٹ میں دلچسپ انکشافات بھی کیے اور زندگی کے انوکھے پہلوؤں پر بات چیت کی۔اس کے علاوہ انہوں نے بھارت اور پاکستان کے درمیان جاری چیمپئنز ٹرافی کے تنازع پر پی سی بی کو اہم مشورہ بھی دیا۔جیو نیوز پوڈ کاسٹ میں شاہد آفریدی نے پی سی بی کو بھارتی کرکٹ ٹیم کے پاکستان نہ آنے کی صورت میں پاکستانی ٹیم کو بھی بھارت نہ بھیجنے کا مشورہ دے دیا ۔انہوں نے کہا کہ اگر بھارتی ٹیم یہاں آکر نہیں کھیلتی تو پاکستان بھی بھارت جاکر نہ کھیلے۔واضح رہے کہ بھارتی میڈیا نے دعویٰ کیا ہے کہ بھارتی کرکٹ بورڈ نے آئی سی سی چیمپئنز ٹرافی کے معاملے پرپاکستان کرکٹ بورڈ کا مطالبہ تسلیم کرلیا ہے اور معاملات طے پاگئے ہیں۔بھارتی میڈیا کا دعویٰ ہے کہ پاکستان کی میزبانی میں چیمپئنزٹرافی ہائبرڈ ماڈل پر ہی ہوگی۔چیمپئنز ٹرافی میں بھارت اپنے میچز دبئی میں کھیلے گا۔بھارتی میڈیا کا کہنا ہے کہ3 سال تک پاکستان، بھارت ایک دوسرے کے ملک میں نہیں کھیلیں گے۔بھارتی میڈیاکے دعوے پر آئی سی سی ، بی سی سی آئی اور پی سی بی کا کوئی ردعمل نہیں آیا ہے۔واضح رہے کہ شاہد آفریدی کا یہ خصوصی انٹرویو ناظرین جیو کے تمام سوشل میڈیا پلیٹ فارمز پر دیکھ سکتے ہیں۔