پشاور (نیشنل ٹائمز) وزیر اعلٰی خیبرپختونخواہ نے ارشد ندیم کو سرکاری خزانے کے بجائے اپنی جیب سے انعام دینے کا اعلان کرتے ہوئے کہا ہے کہ ارشد ندیم نے بھرپور جذبے سے میڈل جیتا، آگے بڑھنے کیلئے جذبہ ضروری ہے، ارشد ندیم ہمارے سامنے بہترین مثال ہے۔ تفصیلات کے مطابق پیرس اولمپک میں پاکستان کیلئے گولڈ میڈل جیتنے والے اولمپئین ارشد ندیم کیلئے وزیر اعلٰی خیبرپختونخواہ نے بھی خصوصی انعام کا اعلان کیا ہے۔
وزیراعلیٰ خیبرپختونخواہ علی امین گنڈاپور نے پیرس اولمپکس میں پاکستان کا سرفخر سے بلند کرنے والے ارشد ندیم کو اپنی جیب سے انعام دینے کا اعلان کرتے ہوئے کہا ہے کہ سرکاری خزانہ میرے باپ کا نہیں کہ سرکاری فنڈز سے کسی کو کچھ دینے کا اعلان نہیں کروں گا، ارشد ندیم کو انعام سرکاری فنڈ کے بجائے اپنی جیب سے دوں گا، صوبے کا پیسہ اس لئے بچایا جارہا کہ عوام پر لگایا جائے۔

علی امین گنڈاپور نے اولمپئین کو خراج تحسین پیش کرتے ہوئے کہا کہ ارشد ندیم نے بھرپور جذبے سے میڈل جیتا، آگے بڑھنے کیلئے جذبہ ضروری ہے،ارشد ندیم ہمارے سامنے بہترین مثال ہے۔