پشاور (نیشنل ٹائمز) پی ٹی آئی دورمیں شروع ہونے والا 10 بلین ٹری منصوبہ اہداف حاصل کرنے میں ناکام ہوگیا، آزاد کشمیر، گلگت بلتستان سمیت کہیں اہداف حاصل نہ ہوسکے۔ذرائع کے مطابق ٹین بلین ٹری منصوبے کے تحت درخت لگانے کا 63 فیصد ہدف حاصل کیا گیا، تمام صوبے بشمول آزاد کشمیر اور گلگت بلتستان سمیت درخت لگانے کے اہداف حاصل نہ کیے جاسکے، 4 سال میں منصوبے کے تحت 2 ارب 6 کروڑ 89 لاکھ درخت لگائے گئے۔ٹین بلین ٹری منصوبے کے تحت چارسال کیلئے 3 ارب 29 کروڑ 60 لاکھ درخت لگانے کا ہدف مقرر کیا گیا تھا۔ ذرائع نے بتایا کہ پروگرام کے اہداف سے ایک ارب 22 کروڑ 71 لاکھ درخت کم لگائے گئے، سندھ منصوبے کے مقررہ ہدف کے تحت 79 فیصد درخت لگانے کے ساتھ پہلے نمبر پر رہا۔پنجاب 71 فیصد کے ساتھ دوسرے اور خیبرپختونخوا 70 فیصد کے ساتھ تیسرے نمبر پر رہا، گلگت بلتستان نے 41 فیصد ہدف حاصل کیا۔ذرائع کا مزید کہنا تھا کہ ٹین بلین ٹری منصوبے کے تحت آزاد کشمیر نے درخت لگانے کا 29 اور بلوچستان نے 17 فیصد ہدف حاصل کیا۔