پیرس (نیشنل ٹائمز) اولمپکس میں جیولن تھرو کے فائنل میں کوالیفائی کرنے والے ارشد ندیم نے درخواست کی ہے کہ میں پاکستان کا نام روشن کرنا چاہتا ہوں، قوم میری کامیابی کے لیے دعا کرے۔ منگل کو پیرس اولمپکس میں پاکستان کے لیے میڈل کی امید ارشد ندیم نے 24 کروڑ پاکستانیوں کا خواب پورا کرنے کی جانب پہلا قدم لیتے ہوئے جیولن تھرو کے فائنل میں کوالیفائی کیا۔
جیولن تھرو کوالیفیکشن راؤنڈ میں گروپ بی میں شامل ارشد ندیم کو فائنل میں براہ راست جگہ بنانے کے لیے کم از کم 84 میٹر کی تھرو کرنا تھی۔ ارشد ندیم نے پہلی باری میں 86.59 کی تھرو کرکے کوالیفائی کرلیا۔ فائنل میں پہنچنے کے بعد جیولین تھرور ارشد ندیم نے پیرس میں جیو نیوز سے گفتگو کرتے ہوئے کہا کہ اولمپک گیمز میں پاکستان کا نام روشن کرنا چاہتا ہوں، پر امید ہوں کہ فائنل میں اچھا رزلٹ دوں گا۔

ارشد ندیم نے کہا کہ شائقین کا سپورٹ کرنے پر مشکور ہوں، فارم میں ہوں ، فٹ ہوں ، قوم میری کامیابی کے لیے دعا کرے۔ اس کے علاوہ ان کا کہنا تھا کہ امید ہے فائنل میں بھارت کے نیرج چوپڑا اور میں اپنے اپنے ملک کا نام روشن کریں گے۔ ارشد ندیم نے کہا کہ نیرج چوپڑا ایک اچھا دوست ہے، ہم فائنل راونڈ پر فوکس کریں گے، سپورٹ کرنے پر شائقین کا شکریہ ادا کرتا ہوں۔ یاد رہے کہ ارشد ندیم نے گزشتہ سال ورلڈ چیمپیئن شپ میں چاندی کا تمغہ جیتا تھا، اسی دوران کامن ویلتھ گیمز 2022ء میں انہوں نے گولڈ میڈل جیتا تھا اور وہ 1962ء کے بعد سے پہلے پاکستانی ایتھلیٹ بن گئے تھے جنہوں نے 90.18 میٹر کا فاصلہ طے کرتے ہوئے زبردست تھرو کے ساتھ مقابلے میں طلائی تمغہ جیتا تھا۔