اسلام آباد (نیشنل ٹائمز) متحدہ قومی موومنٹ کے رہنما ڈاکٹرفاروق ستار نے کہا ہے کہ پی ٹی آئی، جماعت اسلامی اور ایم کیو ایم کے جھگڑے سے کراچی کا نقصان ہو رہا ہے۔نجی ٹی وی کو انٹرویو میں فاروق ستار نے کہا کہ سپریم کورٹ کا جب فیصلہ آیا تھا تب ہی ہم نے اس پر خطرے کی گھنٹی بجا دی تھی، اس فیصلے سے ملک میں سیاسی جماعتوں کے درمیان کشیدگی اور پولرائزیشن میں شدت آئے گی اور ملک کے آئینی اور ریاستی اداروں کے ساتھ جو چیزیں پردے میں ہیں وہ پردہ بھی اٹھ جائے گا۔فاروق ستار نے کہا کہ ہم نے مسلم لیگ (ن)کو کہا تھا کہ اگر پی ٹی آئی کے حمایت یافتہ امیدواروں کے پاس اکثریت ہے اسمبلی میں تو آپ پہلا موقع ان کو دیں اور صاف کہہ دیں کہ ہم حکومت نہیں بنائیں گے، آپ کیوں ایسا بوجھ اٹھا رہے جسے آپ آگے مزید نہ اٹھا سکیں۔انہوں نے کہا کہ میں تو یہ مشورہ بھی دیا تھا کہ اس سے پہلے کہ مخصوص نشستوں پر پٹیشنز سپریم کورٹ میں جائیں آپ خود پہل کرتے ہوئے قانون سازی کردیں۔ایک سوال کے جواب میں فاروق ستار نے کہا کہ 70 فیصد آئی پی پیز مقامی ہیں ، حکومت ان سے بات کرے، اللہ، رسول کا واسطہ دے اور کہے کہ 25 کروڑ عوام نے اتنا دیا اب تھوڑا پنے پیٹ پر بھی پتھر باندھو۔انہوں نے کہا کہ پی ٹی آئی، جماعت اسلامی اور ایم کیو ایم کے جھگڑے سے کراچی کا نقصان ہو رہا ہے، شہر پر پیپلز پارٹی کا مصنوعی اور ناجائز قبضہ ہوگیا اگر ان تین جماعتوں نے مشترکہ لائحہ عمل اختیار نہیں کیا تو پیپلز پارٹی کے پاس اتنا پیسہ ہے کہ پھر وہ کوئی کراچی میں ایسا کھیل کھیل کر بلدیاتی مینڈیٹ اپنے نام کرواتی رہے گی۔