لاہور (نیشنل ٹائمز) پنجاب اسمبلی میں غیرقانونی بھرتیوں کے کیس میں سابق وزیراعلی پنجاب چودھری پرویز الٰہی و دیگر پر فرد جرم عائد نہ ہو سکی۔ پیر کو اینٹی کرپشن عدالت میں پنجاب اسمبلی میں مبینہ غیر قانونی بھرتیوں کے مقدمہ پر سماعت ہوئی، پرویز الہی اور دیگر ملزمان پر فرد جرم نہ ہو سکی۔ چودھری پرویز الہی بیماری کے باعث عدالت میں پیش نہیں ہوئے جبکہ ان کے وکلا کی جانب سے حاضری معافی کی درخواست دائر کی گئی، پی ٹی آئی رہنما کا میڈیکل سرٹیفکیٹ اینٹی کرپشن کورٹ میں پیش کیا گیا۔ میڈیکل رپورٹ کے مطابق ڈاکٹرز نے پرویز الہی کو لمبا سفر کرنے سے روک رکھا ہے، سابق وزیراعلی کی پسلی کا فریکچر ابھی ٹھیک نہیں ہوا، فریکچر کی جگہ انفیکشن ہو گیا ہے۔ واضح رہے کہ عدالت نے آج چودھری پرویز الہی اور شریک ملزم محمد خان بھٹی سمیت دیگر کو فرد جرم عائد کرنے کیلئے طلب کر رکھا تھا۔