اسلام آباد (نیشنل ٹائمز )اوگرا نے پیٹرولیم مصنوعات کی قیمتوں کے تعین کا حکومتی اختیار ختم کرنے پر قیمتوں کے تعین کے بارے میں دو تجاویز تیار کرلیں ہیں۔اوگرا ذرائع کے مطابق پہلی تجویز یہ ہے کہ قیمتوں کے تعین کا اختیار بطور ریگولیٹر اوگرا کو ہی دیا جائے جبکہ دوسری تجویزمیں قیمتوں کے تعین کا اختیار مارکیٹ خود کرے، اوگرا اسے مانیٹر کرے گا۔ذرائع کے مطابق اوگرا کی بطور ریگولیٹر دونوں تجاویز اعلی سطح اجلاس میں پیش ہوں گی، جبکہ تجاویز پر پیٹرولیم ڈویژن کے ساتھ مشاورت اور پھر وزیراعظم سے منظوری ہوگی۔ذرائع نے بتایا کہ پیٹرولیم ڈویژن ایک ہفتے میں قیمتوں کے تعین بارے حتمی فیصلہ کرے گا۔ ذرائع کے مطابق وزیراعظم نے قیمتوں کے تعین سے متعلق اپنی ذمہ داری ختم کرنے کی ہدایت کر رکھی ہے، جبکہ پیٹرولیم قیمتوں کے علاوہ کسی بھی چیز کی قیمت کا تعین حکومت نہیں کرتی۔ پیٹرولیم مصنوعات کی قیمتوں سے اضافے پر ساری تنقید حکومت پر ہوتی ہے۔ ذرائع نے بتایا کہ قیمتوں کے تعین سے متعلق آئل مارکیٹنگ کمپنیوں کو بھی اختیار دیا جا سکتا ہے، تاہم آئل مارکیٹ کمپنیوں کو قیمتوں کے تعین کا اختیار دینے سے اجارہ داری کا خدشہ ہوگا، اور پیٹرولیم ڈیلرز او آئی سی کو قیمتوں کا اختیار دینے پر تحفظات کا اظہار کرچکے ہیں۔