اسلام آباد (نیشنل ٹائمز) پاکستان تحریک انصاف نے جمعہ کو بانی پی ٹی آئی اور دیگر قائدین و کارکنان کی رہائی کے لئے اسلام آباد میں ہونیوالا احتجاج ملتوی کرنے کا اعلان کردیا۔پی ٹی آئی اسلام آباد کے صدر عامر مغل نے کہا ہے کہ جمعہ کو احتجاج کی کال دے رکھی تھی، اجازت کے لیے قانونی راستہ اپنایاا ور ڈی سی کو 23 جولائی کو درخواست دی، ڈی سی کی طرف سے اجازت نہ ملنے پر ہم نے اسلام آباد ہائی کورٹ سے رجوع کیا مگر ابھی تک عدالت نے احتجاج کے حوالے سے تحریری اجازت نہیں دی۔عامر مغل نے کہا کہ معزز عدالت نے دوران سماعت پیر 29 جولائی کو اجازت دینے کا عندیہ ظاہر کیا تھا اور فیصلہ محفوظ کر لیا تھا مگر محفوظ فیصلہ بھی تاحال نہیں سنایا گیا، معزز عدالت اور قانون کا بے حد احترام کرتے ہیں، پارٹی کی مرکزی قیادت کو اعتماد میں لے کر آج کے احتجاج کو عدالتی حکم کے احترام میں پیر تک موخر کررہے ہیں۔