راولپنڈی (نیشنل ٹائمز) عدت کیس میں بری ہونے کے بعد قومی احتساب بیورو (نیب) نے بانی پی ٹی آئی اور ان کی اہلیہ بشری بی بی کی توشہ خانہ کے نئے کیس میں گرفتاری ڈال دی۔جیل ذرائع کے مطابق نیب کی جانب سے بانی پی ٹی آئی اور بشری بی بی کے انکوائری میں عدم تعاون پر گرفتاری ڈالی گئی، ڈپٹی ڈائریکٹر محسن ہارون کی سربراہی میں نیب ٹیم اڈیالہ جیل پہنچی اور نیب ٹیم گیٹ 5 سے اڈیالہ جیل کے اندر روانہ ہوئی تھی۔ نیب ذرائع کے مطابق بانی پی ٹی آئی اور بشری بی بی کو نئے توشہ خانہ ریفرنس میں گرفتار کیا گیا۔ذرائع نے مزید بتایاکہ نیا کیس دس قیمتی تحائف خلاف قانون پاس رکھنے اور بیچنے سے متعلق ہے، نیب کی انکوائری رپورٹ کے مطابق بانی پی ٹی آئی پر ایک نہیں سات گھڑیاں خلاف قانون لینے اور بیچنے کا الزام ہے۔انکوائری رپورٹ کے مطابق گراف واچ، رولیکس گھڑیاں، ہیرے اور سونے کے سیٹ کیس کا حصہ ہیں، تحفے قانون کے مطابق اپنی ملکیت میں لئے بغیر ہی بیچے جاتے رہے۔ قبل ازیں لاہور میں درج 9 مئی کے مقدمات کی تفتیش کرنے والی ٹیم بھی اڈیالہ جیل پہنچی تھی۔ واضح رہے کہ اسلام آباد کی عدالت نے بانی پی ٹی آئی عمران خان اور ان کی اہلیہ بشری بی بی کے خلاف دوران عدت نکاح کیس میں سزا کے خلاف اپیلیں منظور کرتے ہوئے انہیں بری کرنے کا حکم دیا ہے۔