کراچی (نیشنل ٹائمز)سابق گورنر اور ایم کیو ایم کے سابق رہنما ڈاکٹر عشرت العباد ایک بار پھر ملکی سیاست میں قدم رکھنے کے لیے پرعزم ہیں،انہوں نے ایک نئی سیاسی جماعت بنانے کا عندیہ دیتے ہوئے عوام سے کہا ہے کہ اب اپنے مسائل کے حل کے لیے سب کو کوششیں کرنا ہوں گی۔ ایک انٹرویو میں سابق گورنر سندھ نے کہا کہ وہ عوامی مسائل کے حل کے لیے سیاسی پلیٹ فارم کا ہی استعمال کریں گے۔ ان کا کہنا تھا کہ موجودہ صورت حال میں ضروری ہے کہ عوامی خدمت کے لیے سیاسی میدان میں اترا جائے۔ انہوں نے مزید کہا کہ 8 فروری کے انتخابات نے بہت سی چیزیں واضح کردی ہیں۔ اب ضرورت ہے کہ عوامی مسائل حل کرنے کے لیے اپنا کردار ادا کیا جا ئے۔ایم کیو ایم پاکستان کی موجودہ قیادت پر گفتگو سے احتراز کرتے ہوئے ڈاکٹر عشرت العباد نے اس کے لیے نیک خواہشات کا اظہار کیا۔سابق گورنر سندھ کی سیاست میں واپسی پر تجزیہ کاروں کا کہنا ہے کہ ڈاکٹر عشرت العباد سیاست کرنے کا حق رکھتے ہیں اور اگر وہ وطن واپس آکر اپنی سیاسی سرگرمیاں شروع کرنا چاہتے ہیں تو آئین اور قانون انہیں اس بات کی اجازت دیتا ہے۔ سابق گورنر سندھ نے کراچی میں میڈیا کے نمائندوں اور مختلف شعبہ ہائے زندگی سے تعلق رکھنے والے افراد سے ملاقاتوں کے بعد پاکستان کے دیگر شہروں میں عوامی رابطہ مہم کا آغاز کردیا ہے۔ انہوں نے منڈی بہاالدین میں ویڈیو لنک کے ذریعے بقائے پاکستان کے عنوان سے سیمینار سے خطاب کیا، اور عوامی مسائل کو براہ راست حل کرنے کے لیے سیاسی میدان میں واپسی کا اشارہ دیا۔