اسلام آباد (نیشنل ٹائمز) وفاقی وزیر داخلہ محسن نقوی نے کہا ہے کہ انسانی سمگلنگ پر کوئی سمجھوتہ نہیں کیا جائے گا، منشیات کی سمگلنگ اور انسانی سمگلنگ کی روک تھام کے لیے دونوں ممالک کو اپنے باہمی تعاون کو مزید مضبوط کرنے کی ضرورت ہے۔ وفاقی وزیر داخلہ محسن نقوی سے پاکستان میں اٹلی کی سفیر میریلینا آرملینی نے ملاقات کی۔ ملاقات میں دو طرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔ وفاقی وزیر داخلہ نے کہا کہ ان کا حالیہ دورہ اٹلی کامیاب اور نتیجہ خیز رہا اور ان کے اطالوی ہم منصب سے ملاقات کے دوران انسانی سمگلنگ سے نمٹنے کے لئے مل کر کام کرنے پر اتفاق کیا گیا۔ انہوں نے مزید کہا کہ اطالوی وزارت داخلہ کا ایک وفد جلد ہی پاکستان کا دورہ کرے گا جو پاکستانی حکام سے ملاقات کرے گا اور سرحدی علاقوں کا دورہ کرے گا۔ وفاقی وزیر داخلہ نے کہا کہ منشیات کی سمگلنگ اور انسانی سمگلنگ کی روک تھام کے لیے دونوں ممالک کو اپنے باہمی تعاون کو مزید مضبوط کرنے کی ضرورت ہے۔ انہوں نے کہا کہ انسانی سمگلنگ پر کوئی سمجھوتہ نہیں کیا جائے گا، اس کی روک تھام کے لیے تمام ممکنہ اقدامات کئے جا رہے ہیں۔ انہوں نے کہا کہ اگر ہم سرحدوں پر انسانی اسمگلنگ کو روکنے میں کامیاب ہو جاتے ہیں تو یہ دونوں ممالک کے لیے فائدہ مند ہو گا۔ انہوں نے اس بات پر بھی روشنی ڈالی کہ ہنر مند لیبر کی قانونی نقل مکانی سے انسانی اسمگلنگ کی حوصلہ شکنی میں بھی مدد ملے گی اور اٹلی مختلف شعبوں میں ہنر مند پاکستانی ہیومن ریسورس کی خدمات سے فائدہ اٹھا سکتا ہے۔ اس موقع پر وفاقی وزیر داخلہ نے اطالوی وزیر داخلہ کو پاکستان کے دورے کی باضابطہ دعوت بھی پیش کی۔ اطالوی سفیر نے مختلف شعبوں میں تعاون پر وزیر داخلہ کا شکریہ ادا کیا۔ اجلاس میں کمانڈنٹ ایف سی معظم جاہ انصاری، آئی جی اسلام آباد علی ناصر رضوی اور وزارت داخلہ و خارجہ کے اعلی حکام نے بھی شرکت کی۔