اسلام آباد (نیشنل ٹائمز)وزیر مملکت مصدق ملک نے پیٹرولیم مصنوعات پر 17 فیصد جی ایس ٹی وصول کرنے کی تردید کردی اور کہا کہ حکومت کا یہ ٹیکس لگانے کا کوئی ارادہ نہیں۔سینیٹ اجلاس میں اظہار خیال کرتے ہوئے مصدق ملک نے کہا کہ اس وقت پیٹرولیم مصنوعات پر 17 فیصد یا پیٹرول پر 41 روپے اور ڈیزل پر 46 روپے جی ایس ٹی وصول نہیں کر رہے ہیں۔انہوں نے کہا کہ حکومت کا جی ایس ٹی لگانےکا کوئی ارادہ نہیں، گزشتہ حکومت نے آئی ایم ایف سے پیٹرول پر 50 روپے لیوی کا وعدہ کیا، جسے ہم نے کنفرم کیا۔وزیر مملکت نے مزید کہا کہ اس وقت ڈیزل پر 12روپے لیوی وصول کر رہے ہیں، 37 روپے لیوی وصول نہیں کر رہے، اس وقت پیٹرول پر 32 روپے لیوی وصول کر رہے ہیں، 17 روپے نہیں۔ان کا کہنا تھا کہ جی ایس ٹی اور لیوی میں عوام کو پیٹرول پر 58 روپے 78 پیسے، ڈیزل پر 87 روپے 77 پیسے چھوٹ دی جا رہی ہے۔