سعودی شاہ سلمان بن عبدالعزیز اور ولی عہد محمد بن سلمان نے برطانوی کنگ چارلس کو تخت نشینی پر مبارک باد دی ہے۔سعودی میڈیا کے مطابق شاہ سلمان بن عبدالعزیز اور ولی عہد محمد بن سلمان نے کنگ چارلس کی کامیابی اور برطانیہ کی خوش حالی کے لیے نیک خواہشات کا اظہار کرتے ہوئے دونوں ممالک کے درمیان گہرے تعلقات کو مزید فروغ دینے کی خواہش کا اظہار کیا ہے۔شاہ سلمان نے برطانوی ہم منصب کی اچھی صحت کے لیے بھی نیک جذبات کا اظہار کیا۔واضح رہے کہ گزشتہ روز سینٹ جیمز پیلس میں کنگ چارلس سوم کی منصب سنبھالنے کی تقریب کا انعقاد کیا گیا تھا، تقریب میں کنگ چارلس سوم نے باقاعدہ طور پر بادشاہت کا تخت سنبھالا تھا۔ملکۂ برطانیہ الزبتھ دوم کی وفات کے بعد شہزادہ چارلس بادشاہ بن گئے ہیں تاہم آج سینٹ جیمز پیلس میں منعقدہ تقریب کے دوران ایک سیشن کونسل نے کنگ چارلس سوم کی بادشاہت کا باقاعدہ اعلان کیا۔