اسلام آباد(نیشنل ٹائمز)وفاقی وزیر خزانہ مفتاح اسماعیل کا کہنا ہے کہ حکومت کے پاس 13 ماہ ہیں لیکن میرے پاس شاید اتنا وقت نہیں ہے۔کراچی میں ایک تقریب سے خطاب کرتے ہوئے مفتاح اسماعیل کا کہنا تھا پاکستان میں کوئی بھی ٹیکس دینا نہیں چاہتا، ہر ملک سے پیسہ مانگ رہے ہیں، بہت شرم آتی ہے۔مفتاح اسماعیل نے کہا کہ پی ٹی آئی نے آئی ایم ایف سے معاہدہ توڑا تھا، نومبر میں معاہدہ کیا اور پھر ایندھن پر سبسڈی دے دی۔وزیر خزانہ کا کہنا تھا حکومت میں آنے کے بعد ہماری پہلی ترجیح آئی ایم ایف پروگرام کی بحالی تھی، حکومت سنبھالنے کے بعد فوراً آئی ایم ایف سے رابطہ کیا اور ملک کو ڈیفالٹ ہونے سے بچایا۔ان کا کہنا تھا کہ حکومت پاکستان نے کبھی ڈیفالٹ نہیں کیا، حکومت پاکستان آئندہ بھی ڈیفالٹ نہیں کرے گی۔