لاہور(نیشنل ٹائمز): پاکستان مسلم لیگ ن کے قائد میاں نواز شریف کی واپسی کے لیے پارٹی کی جانب سے عدالتوں سے زیادہ سے زیادہ ریلیف لینے کا فیصلہ کیا گیا ہے۔پارٹی ذرائع کے مطابق سابق وزیراعظم کی وطن واپسی سے قبل ان پر قائم مقدمات اور نااہلی ختم کروانے کے لیے عدالت سے رجوع کرنے کا فیصلہ کیا گیا ہے۔ اس سلسلے میں نواز شریف کی قانونی و آئینی امور کی ماہر اپنی لیگل ٹیم سے مشاورت مکمل ہو گئی ہے، جس میں انہوں نے لیگل ٹیم کو رِٹ پٹیشنز کی تیاری کی ہدایت کر دی۔ذرائع کے مطابق نواز شریف نے کہا ہے کہ ان کی خواہش ہے کہ وطن واپسی ہو تو تاحیات نااہلی، قید و جرمانے کی سزائیں اور دیگر تمام کیسز ختم ہو چکے ہوں۔ اس حوالے سے قانونی ٹیم نے نواز شریف کو عبوری ضمانت، راہداری ضمانت یا ضمانت قبل از گرفتاری کروانے سے متعلق بھی اپنی رائے دی۔