وزارتِ صحت نے ملک میں منکی پاکس کے پھیلاؤ کو روکنے کے لیے بیرونِ ملک سے آنے والے تمام مسافروں کی اسکریننگ کا فیصلہ کیا ہے۔عالمی ادارۂ صحت کی جانب سے منکی پوکس کے پھیلاؤ کو عالمی ایمرجنسی کا درجہ دیے جانے کے بعد وزارتِ صحت نے ملک میں منکی پاکس کی روک تھام کے لیے ضروری اقدامات اٹھانا شروع کر دیے ہیں۔وفاقی وزیرِ صحت عبدالقادر پٹیل کا کہنا ہے کہ انٹرنیشنل ہیلتھ سیکیورٹی ریگولیشن کی سفارشات پر عمل درآمد اور مؤثر اقدامات کو یقینی بنایا جا رہا ہے۔اُنہوں نے بتایا کہ بالخصوص افریقہ سے آنے والے مسافروں کی اسکریننگ کا فیصلہ کیا گیا ہے۔وفاقی وزیر نے بتایا کہ سائئنسی بنیادوں پر ملک کے تمام داخلی راستوں کی کڑی نگرانی کی جا رہی ہے اور عالمی ادارۂ صحت کی گائیڈ لائنز پر بھی بھرپور عمل کیا جا رہا ہے۔عبدالقادر پٹیل نے بتایا کہ ہیلتھ ورکرز کی استعدادِ کار بڑھانے کے لیے ٹھوس اقدامات کیے جا رہے ہیں اور عوام میں آگاہی کے حوالے سے بھی تمام مؤثر اقدامات کو یقینی بنایا جا رہا ہے۔اس حوالے سے ترجمان وزارتِ صحت کا کہنا ہے کہ وزیرِ صحت نے این سی او سی کو بھی ہدایت جاری کی ہے کہ کورونا وائرس کے ساتھ ساتھ منکی پاکس کی مانیٹرنگ کو بھی یقینی بنایا جائے۔ترجمان نے یہ بھی بتایا ہے کہ ملک میں ابھی تک منکی پاکس کا کوئی کیس رپورٹ نہیں ہوا، لہٰذا وفاق اور صوبے مل کر ابھی سے اس وباء کی روک تھام کے لیے مؤثر اقدامات کریں۔